Уладар электрычных схем

Слесар электрамантажных работ Гродзенскага завода гандлёвага машынабудавання Уладзімір Высоцкі займаецца электрычнай камплектацыяй абсталявання, якое выпускаецца на прадпрыемстве.

Адразу звяртаю ўвагу на поўнае падабенства імя і прозвішча з вядомым бардам. Аказваецца, гродзенец яго даўнішні прыхільнік. «У маёй маладосці яго песні былі вельмі папулярныя, — кажа ён. — У нейкім сэнсе нават выхоўвалі». Ці тыя жыццёвыя песні, ці склад характару Уладзіміра Мікалаевіча такі надзейны, але вось ужо амаль 50 гадоў ён нязменна працуе на заводзе, адзін з ветэранаў працы прадпрыемства. І ўвесь гэты час спасцігае новыя асаблівасці абсталявання.

— Прыходзіць новая дакументацыя — трэба ўмець яе чытаць, ведаць схемы. Вось, бачыце, якое ў пасудамыечнай машыне электраначынне. Раней была механіка, зараз электроніка. Усё мяняецца, таму трэба пастаянна вучыцца, каб авалодваць такімі схемамі, — расказвае спецыяліст.

Прадпрыемству больш за 60 гадоў. Можна сказаць, што ўвесь вытворчы шлях завод праходзіў не толькі на вачах Уладзіміра Мікалаевіча, але і з яго ўдзелам. Ён быў сведкам таго, як была наладжана вытворчасць ў савецкі час, калі на заводзе нават працаваў філіял маскоўскага навукова-даследчага інстытута. З развалам Саюза завод хоць і перажываў складаныя часы, але дзейнасць не спыніў. Зараз тут выпускаецца патрэбнае і складанае абсталяванне. У тым ліку медыцынскія боксы, электранагравальнікі, пасудамыечныя машыны, гідраакумулятары і іншая прадукцыя.

Наш субяседнік якраз займаецца электрамантажнымі работамі пасудамыечных машын. Гэта не тая бытавая тэхніка, якую мы прывыклі бачыць у дамах, а цэлы вялікі комплекс агрэгатаў для адпаведных устаноў і гандлю. За гадзіну такая машына спраўляецца з трыма тысячамі талерак. Тут выпускаюць некалькі відаў такога абсталявання. За гады паставак многія спажыўцы ўпэўніліся ў іх якасці і заказваюць менавіта іх. Ідзе прадукцыя і на расійскі рынак.

Уладзімір Мікалаевіч, здаецца, ведае ўсе асаблівасці і параметры сваіх машын. Ён займаецца поўнай зборкай электроннага начыння, якое змяшчаецца ў некалькіх невялікіх скрынях. «Калі б не электроніка, гэтыя скрыні былі б у некалькі разоў большыя, — кажа майстар.

— А так яны выглядаюць кампактна, дазваляюць кіраваць многімі функцыямі. Такім чынам, душ, паласканне, сушка, абдзіманне — гэта ўсе ідзе ў аўтаматычным рэжыме», — паясняе спецыяліст.

Уладзіміру Высоцкаму нядаўна споўнілася 70 гадоў, і ён поўны сіл і энергіі. З’яўляецца перадавіком вытворчасці, больш за 30 гадоў быў брыгадзірам. Работа, як і для большасці прадстаўнікоў яго пакалення, з’яўляецца важным складнікам лёсу. «Жонка ўжо просіць, каб я сыходзіў, але бачу, што патрэбен тут, інакш, мабыць, і сышоў бы. Плацяць дастойную зарплату, умовы добрыя, за стаж надбаўка, добрыя адносіны з боку кіраўніцтва завода», — пералічвае перавагі вытворчага жыцця субяседнік.

— Адсутнасць гэтага чалавека будзе адразу заўважана, — каменціруе старшыня пярвічнай арганізацыі прафкама завода Анатоль Леваненя. — Ідзе змена пакаленняў, вопыт варта перадаваць, але нам важна захаваць і нашы кваліфікаваныя кадры. Работы шмат.

Прадпрыемства выпускае да сотні вырабаў, абсталяванне пастаянна мадэрнізуецца. Але новыя тэхналогіі без кваліфікаваных кадраў наўрад ці дадуць эканамічны эфект. Таму важна клапаціцца аб людзях і забяспечваць ім камфортную працу. На прадпрыемстве значна палепшыліся бытавыя ўмовы, своечасова выплачваецца заработная плата. А ўзрост для работы не перашкода.

источник https://zviazda.by/be/news/20240722/1721661493-materyyalnyya-stymuly-dlya-pensiyanerau-yakiya-pradauzhayuc-pracavac

Маргарыта Ушкевіч 

Фота аўтара